Friday, June 08, 2007
又去濕地公園
因為有個半年證，所以有時間又心思思想去，結果當然係去左啦！
上次懶冇上去睇，
今次試下上去呢個斜坡睇下！
妖！浪費晒我D腳骨力！
都係入閘！
嘩！正啊！如果唔係隔住塊玻璃就好喇！
去到都兩點幾，個肚餓到打晒鼓！裏面冇得揀，只得：
價錢都好似同出面差唔多，應該貴在跟餐飲品冇得平。不過，可以咁樣食飯：
我都有景睇！
呢個意粉好味！雞扒粟米汁意粉。
唯一美中不足係：張台上手果一pair男女留底左一推垃圾唔執（呢間大家樂係採用「Serve Yourself」政策，食完飯自己收。）！果兩條友仲要係濕地o既staff！No Good！
我幾乎食完先至有阿姐出現，好可憐啊！
食完精力充沛，加上個景又唔會自己轉，即刻起身四圍走下！
玩左：
4D（定係3D﹖都唔係好清楚。）電影，講你係一滴小水滴，玩五分鐘。
跟住：
要玩五個遊戲，高低分唔同個結局畫面都唔同，仲可以email張成積表俾自己，不過唔知係佢個system未ready，定係我打錯左字，居然收唔到…好失望…
除左講坐冇聽，幾乎都行晒，終於都忍唔住行左出冇瓦遮頭o既地方…
曬死人喇！
（當時）就來到夏天，又有唔同o既花會開！可惜只得一款好睇…
咁唯有睇下蟹仔啦！
下次去到一定要搵個人問下，究竟D窿係人挖定係D魚仔蟹仔自己整！有乜理由咁圓﹖
彈塗魚得返D魚毛仔，大魚都唔知去晒邊，放到最大都睇唔到，我現場都只係見到D好似蝌蚪咁大粒o既魚仔彈下彈下…睇蟹仔啦！
最大果隻都都唔知有冇部手提電話咁大…
由於熱到頂唔順，最後都要走返入冷氣地方…
去完第二日睇報紙，先至知（當日o既）過幾日就會搞個蝴蝶園~~！
好彩我個證九月先到期，大家有興趣，可以夾假一齊去玩啊！
Thursday, June 07, 2007
寄養
因為去旅行，有好幾樣屋企野要拜托人地幫忙，其中一樣就係我唯一o既盆栽——一盆羅勒。
又因為冇時間煮野食，一早就將佢放左響小安安屋企養，希望佢有用啦。
羅勒好香，反而咬落冇乜特別味，所以我一般都唔多會將佢放入口，通常係臨起鑊半分鐘放入去撈一撈、焗一焗。
盆野我平日放響向東窗口（試過放露台，但係西斜，晒到乾晒水），唔落肥都大得幾快，落肥就大得更加快！成日要擇，有一次，擇左好多，又冇特別野煮，望住D葉覺得好浪費，就將佢放落個飯盒度叮……結果，好好味呀！肉本身有味架喇，咬落去果下D羅勒香標晒出來，搞到成餐飯成耐左，因為唔捨得咁快食完！
材料：微波爐飯盒一個、飯、餸（鴨胸去凍肉舖有，唔駛買特別貴，我買16蚊兩件，味道同廿蚊一件唔差太遠，圖中只有半件鴨胸。）
做法：煮飯、做餸、裝入飯盒、面放一「住」羅勒，需要食時加蓋叮，叮完條羅勒（如圖）隨你喜歡食唔食。
Monday, June 04, 2007
病
由細到大，除左三四歲一次撼穿頭入醫院聯針之外（都好似唔駛入院訓），都未試過真係病到唔返得學。
到到要出來做野，射咁多次波有幾多次係真病﹖可以話次次都係真病，但係真病又有幾多次係病到起唔到身、返唔到工﹖
「賤骨頭」，細細個就俾人咁鬧到大，係冇鬧錯。我傷風感冒除左鼻水直流之外，睇完醫生都仲可以去行陣街；肚瀉咩﹖係起初連環疴果時冇乜力，清左之後就即刻周圍走…其他病呢﹖除左發炎之外，都未試過其他病…手軟腳軟﹖都會有，在我而言只係好攰、唔想陏同眼睏o既感覺，基本上要我返工係可以。
所以，好唔明大家病果時果種辛苦法…
未入呢一行之前，我唔會體諒人地病而爽約，就算俾我見到你好辛苦咁樣，我都只會唔出聲企響一邊，對一D唔熟o既人，甚至會暗地裏諗：「係咪真係可以病成咁呀﹖」
係，我認我冇同情心，呢樣野我大學畢業之前都冇，我家教係冇同情心，阿爺阿麻同老豆教我同情人地，俾老母教訓番轉頭，話外人唔關自己事、唔駛可憐，咁屋企人呢﹖佢除左我細佬之外，冇可憐過任何人，當然包括我在內，所以我都冇諗過去可憐人地，覺得呢樣野係得閒冇野做o既人先至會有。
到到大學之後，離開屋企，果時先至開始發現我可以同情人地，但係都仲係未接受到「病係好辛苦」呢個事實。
直至入左呢行，成日要寫「死人野」，見得多「好小病都死得人」，先至慢慢接受到「病原來可以係好辛苦」。（各位朋友，你地以前病到好慘咁樣我都冇問候過你，真係好對唔住。）
同情心係有返D，但係我o既慨念只係可以由「係咪真係可以病成咁呀﹖」改到去「病點解會病到咁慘架﹖」每當見到有人（真）病，就會不停咁諗：「點解會病架﹖」偶然都會諗到發「掹掙」…
我好討厭見到人病。
所以呢，（男）朋友啊！你可唔可以照顧好D自己，唔好病呀﹖