Friday, March 09, 2007
日式住家菜
好鍾意食燒魚，可惜一直冇辦法整到，用電爐仔始終差少少咁。
有一日去十蚊店買左個燒網。
頭炮係多春魚！
好好味呢！
屋企果頭走一走
有一日假要平日放，只可以放星期一，一早就諗左要周圍行下，點知星期日突然開始陰天，都幾驚去唔成，朝早起身，都唔差喎！
可惜，梳洗完、食飽飯、坐完車，三個鐘之後就天都黑晒咁滯……下晝兩點咋！
好彩冇落雨，都幾暖下，都出到來就繼續去啦！
第一站，濕地公園！住得咁近（近過其他人好多下），一直都想來望下，睇地圖都知好近民居，來到認真咁感受到！
上星期申請左個半年證，$50（全年$100，單次$30），因為諗住遲下會同男朋友再來，條數會抵返。張證好似以地鐵飛咁，連個外型都好似，厚少少啦。張相造左手腳，中間應該印住個名架，不過入場都冇人查證。
首先睇室內展覽，一個人行其實幾驚架，唔係驚搞爛D機關，而係燈光好少，個 feel 幾恐怖，黑到有污糟o既感覺……個「扮熱帶雨林地區」，一推門入去黑 mungmung，又熱又焗，明明有標籤介紹展品，偏偏冇燈照住（又或者極暗），我好認真咁覺得掽牆會有手伸出來
，行左入去第二步我真係望番轉頭好想走番出去！一秒之後，聽到前面有人講野，個心先至定左少少（少少咋），一路行，都仲係覺得入左鬼屋，有部份機關好似冇開，有部份又好似壞左，結果我都冇乜點睇就出番來。
係咁易又行埋「細路區」，光左少少啦，見到路，都係暗，我仍然係覺得污糟同有手伸出來拉我，乜都冇玩就行番出來！
出到露天地方先至定番晒！見到傳聞中o既貝貝，佢新居同傳聞之中一樣咁細，只係一個有水有石有草o既玻璃箱，仲細過以前響嘉道理農場，都唔知搬來做乜！佢水平面響我eye level，我僅僅望到佢爬響舊大石上面咋。
再入，係好過荒地少少o既地方……呢張相係其中算唔錯o既畫面：
仲有半邊公園對住住宅：
當局可能真係好想保留濕地o既原貌，路牌都好似唔捨得插入地，全程見到好幾個呢類路牌，真係有人手多咁點算﹖
不過都尚算有少少可取o既地方，首先帶大家去觀鳥屋！入去喇！
園入面有幾間觀鳥屋：
睇唔睇到雀仔﹖唔係好清楚﹖咁用望遠鏡睇啦！我去完之後有人話我知，傳聞有部份雀仔係假架！我為左認明我睇到果D係真雀仔，揀左幾張有動感o既俾大家睇（其實就只影到呢幾張，將傻瓜機個鏡頭黐埋望遠鏡個eye-piece，因為中途有幾個細路鬼渣咁嘈話要睇，所以快快脆脆影完就走左）：
要注意，唔係間觀鳥屋都有望遠鏡，所以見到有就好望多兩眼！
園中央有個玻璃屋，有人講解濕地生態，我冇睇，因為感覺好悶，但係屋外面有凳坐，行得攰幾好坐架！
有條浮木橋，一路行一路會搖，幾得意：
橋兩邊有紅樹林同招潮蟹，只可惜蟹仔太細隻，條橋又太搖，都影唔到……
唔係條條路都有欄杆，我行呢度果時都幾驚！
近住室內展館會有少少人工栽種植物，但係品種唔多，希望遲下會種多D。
有條路兩邊種滿桂花，真係聞到桂花味架！乜味﹖咪好似食緊桂花糖水咁lor！
以下係意外收獲：
小蜜蜂，嗡嗡嗡！
點蟲蟲，但係佢個樣唔似識飛喎！
臨走聽到有人話去睇小海龜，諗住去睇下，點知一問之下，要入番個鬼屋轉入去先有得睇，即刻縮沙走人！
園外面都有少少地方唔駛收入場費，手拖住手的話，行下都冇問題，不過我今日唔係。
去完濕地，繼續向西部進發！入流浮山！買左蠔油！好好味架！
因為之前做過單女屍，見網頁講下白泥好靚，於是一心入去，買左蠔油就走，冇周圍睇過，過後先勁後悔，唯有下次再來過啦。
入去下白泥果架小巴係廿四座，好似白牌咁，唔係個司機問我，我真係會miss左一班車！入到去，懶醒以為最大條路係啦，點知行左去稔灣口，紅樹真係見到，不過望上少少對面岸唔係蛇口，係貨櫃場！試下沿海行唔行得到去有景睇果邊啦，點知一踩，幾乎成隻腳掌陷晒入泥裏面！即時走人！對腳全部都係泥，好彩係防水鞋咋。
果度逢親草地都俾人用鐵絲網欄住，一路行一路有狗狗高聲「觀迎」，入來條路行左半個圓圈，諗住斜斜地行番出去啦，正想行入路口，有個打緊麻雀o既村民話條路冇得行，又由原路行番出去。死死地氣問士多事頭婆，先至知原來條路係響士多旁邊，一班八婆坐響度吹緊水，擋住左條路，而事實上，果條路係一個鐵絲網開閘位，正常係唔會諗到可以行得出海邊架。
行到出觀音廟，出到海喇！但係都冇紅樹，只係得幾枝杆插響海入面，點睇都唔似蠔田lor，右手邊好遠見到有似紅樹物體，同理港深橋（好似係咁叫），想行過去睇下，不過聽到廟祝同幾個落水撈蝦同蠔o既人嘈交，怕佢關埋個閘，天又開始黑，就走人喇。影左一張相，不過冇乜野睇，唔 post 喇。
最後坐小巴返元朗市，買餸返屋企煮飯，咁就一日喇。
Thursday, March 08, 2007
因為拍拖生活太美滿，搞到少左寫作，真係唔好意思……
而家先來一D輕鬆野，都幾長，希望各位睇得開心。
上班逸事‧同事篇——豬小姐（上）
豬小姐其實係英文兒童節目《布公仔時間》主角之一，好貪靚亦成日以為自己最靚（事實上節目入面冇其他女性角色…）。
以下落來要講呢一位同事，其實我唔算識佢，又唔係同組，但係就成日會見到佢，我第一次見到佢，就直接將佢同豬小姐連埋一齊——肥肥地、豬豬地（個樣）、好貪靚又成日以為自己好靚（我諗佢唔會以為自己係最靚掛，而我公司都唔請盲人）。
豬小姐同好多港女一樣：好貪靚、成日以為自己最靚、自以為是（佢可能有料，不過我feel唔到）……其實冇乜野好寫，不過佢最近實在令我忍無可忍…！佢居然可以連續成個月（起碼）污染到我視覺，真係都幾難得，所以我決定響我個blog俾個credit佢。
故事開始自八月尾，我同某同組同事小姐不約而同電左髮（都唔記得邊個先邊個後，當住我先，因為呢個blog係我地頭，咁樣我會比較投入，而且話佢學我，先至串到劇情），我個頭成七百蚊（原價八百，髮型師見我幫襯十幾年，會收少一百），真係物有所值，同事小姐好羡慕又妒忌（佢死都唔信我個頭要咁貴，哽係啦，佢人工高我好幾倍，哽唔信我捨得/俾得起，更何況我第一日返工就話佢個頭其實兩百蚊都有找），同時豬小姐都好似好羡慕咁，我行開行埋都見佢望住我（都可以理解，因為自從同現任男友拍拖後，個人開心左好多，都花多左時間扮靚），之後佢突然有一日「set」左一頭攣髮返工……
佢「set」呢個頭，真係幾「pro」，絕對唔係我地細細個鬢起辮再壓實個頭訓醒會攣咁兒戲，而係似係用set頭髮捲捲實個頭訓到第二朝咁樣！嘩…勁惹笑……之後就冇見過佢以呢個look示人。
新一年以來都冇冷過，我當然盡量短裙短褲啦，仲有唔少得就係高跟靴同長襪加高跟鞋。都唔可以話有人學我，其實大家都係咁著啦。豬小姐都冇學，不過我諗佢係冇呢類衫掛。
點知發左花紅之後，豬小姐突然走去電左個髮，我睇佢個頭都電左唔少錢，好似set左頭返工咁（即係電我果隻），不過佢好似前世未電過髮，完全都冇將頭髮鬆開佢（我細個第一次電髮都係咁架，以為訓覺壓住同埋梳佢會好快變番直），搞到個頭成個未索夠水o既公仔麵咁，仲要成日個頭好似梗左咁唔郁，睇見佢就慘囉，唔駛講，（刻薄少少講句）個頭直頭係肉酸啦！個頭真係唔適合佢，呢樣野佢又出奇咁清楚，結果第二日（我見到佢o既第二日，都唔係好記得，但一定係三日之內），佢就剪短左個頭，只係剩番有一個圈咁長，睇落似少頭髮版《蠱惑仔》鄭伊健！
之後佢冇學我喇——一次咁多啦！農曆新年果時，佢日日都住一件大紅色孖襟褸，件衫都幾多detail位，之但係佢個身型成個葫蘆咁，搞到好睇o既地方唔係因為凸起爆左出來，就係因為凹左落去壓皺左…好可憐啊~~件衫。
再冇幾多日之後，佢大紅孖襟不特止，仲要短褲長靴……佢個look簡直係殺死人！我第一眼係先見到佢個背影，大紅孖襟著到皺晒唔在講，大腿粗就咪露啦，佢露又要著長靴（唔知係佢腳短定係個款係咁，總之係到膝頭果隻），我仲未講完，佢對靴都有detail位架！
佢對靴係全黑色，靴頂有一個反領，有最少兩寸咁闊，斜斜地反落來，後面係小圓領，中間一個皮繩蝴蝶結（即係小學校服果款圓領加蝴蝶結呢）……冇錯對鞋係好靚，之但係佢身型唔適合呢……好地地件大紅孖襟佢著到成隻阿拉斯加雪蟹咁，加埋對鞋，就好似著左套盔甲，去得打仗！前面呢，我一直都避開唔睇。
近日凍返，豬小姐又來新look！今次扮大白熊！大家諗下：一個肥厚o既身體著住件雪白厚褸，領位仲要係毛毛大反領！我只能夠用「慘不忍睹」來形容……
我以上所講都係新衫，我諗豬小姐新年期間都出左唔少血，各位同事都有排受……小妹尚幸有機會病一場請幾日假，希望唔好要寫下集啦。