Tuesday, July 25, 2006
病
公司極高層係一個好怕死o既人（我諗係咁，因為佢每次外出都最少有四個保鑣）。舊年十月尾係咁傳「禽流感喇，好因住喇！」所以佢就「皇恩浩蕩」咁，將所有感冒病假括免扣薪，直至到上個星期，佢可能覺得肉赤（其實少個人返工係其他人做多左野，佢除左預左要俾o既人工同埋已經俾左o既員工醫療保險，都冇野要洗佢錢啦），就話而家禽流感冇咁行喇，等你地病得咁過癮丫拿！
我地公司規定：請一日假就扣一日薪，你地用自己假期或者年假來頂就隻眼開隻眼閉，病要病夠四日先會出到五分四人工！其實真係好難有病係病到四日，小病病唔到咁多日，大病又真係唔止……咁即係話一係最好唔好病，病親就要大病。小病呢，既然病唔到四日就好返工啦！
難委佢出通告之前果日我仲病緊……呢一個星期以來我日日都唔舒服，本身對冷熱轉變好敏感，偏偏返工o既時候就最熱，出門口即刻熱到浴，之後要坐響架蒸籠咁o既車返工，返到公司我已經暈暈地，身上熱氣都未散，已經有冷氣「攝」入個人度，惟有即刻著外套，之但係著住外套就焗住o的熱氣響身，唔著又會凍……我都唔知係冷親定係熱親，有人話我中暑……我血壓低，發燒都係得37.5度……一時熱一時冷……返工迷糊半日先清醒返少少……乞嗤鼻水咳不停循環……點知次次去到醫生度冇咳不特止就連鼻水都收埋……
可能係我本身唔想返呢份工，心理影響到生理。不過我真係想唔舒服可以安安樂樂咁放下病假……
貓，不如你傳染我丫！
Friday, July 21, 2006
油盡燈枯
晨早九點幾起身去教琴，都仲未訓醒，四點九就去到書展，可能之前睇過一D宣傳品覺得好吸引，就好俾心機去行……見到好多書都好想擁有佢，之但係彈藥有限，所想買之前都諗得好清楚：
- 我係好想擁有本書﹖定係好想睇本書﹖
- 係咪今日唔買第日會冇(好難搵)﹖
- 遲D買會唔會平D﹖
- ……
經過一輪考慮，我買左：
《Freakonomics》我想睇好耐，之但係佢愈出愈多版，都唔知點買好，雖然我鍾意「青蘋果橙」個封面，但係個職員(檔口果間公司個職員，唔係請返來收銀同捉高買果D parttime)話呢個版同大本一樣，仲係update D，就信佢啦！$80
《Kitchen Confidential》都係想睇好耐，等左好耐都係咁上下價。$96
《Old Filth》係「鄧」腳，見佢係"Shortlisted for the Orange Prize"咋。$80
Dymocks檔，因為英文書買二送一，共銀$176
其實我係因為見到宣傳，本《15分鐘法語》六十幾蚊特登去搵，想買埋德語、意大利語同西班牙語，不過相信直到下一次書展或者信用卡減價都冇咁多時間睇得晒，所以只買一本，$62.4。日語學習書想買好耐，不過好少有埋CD，見呢本平所以買，$58.4。《家常菜》唔駛講，我一定會睇得晒，$46.4。中華書局檔。
可能你會覺得我買太多煮野食書，不過呢兩本講我最鍾意食o既野，真係認唔住，共銀$132.8。萬里檔。
幫同事買左件T，UNHCR義賣檔，$80，冇散紙冇得找。而家有少少後悔冇同自己買一件，請問有冇人將會去﹖可唔可以幫我買件男裝細碼(如冇碼可買女裝，我15吋膞)﹖(可以的話，請打電話俾我。)
剛才只係Hall 1咋……行完已經七點八，腳仔超攰！
轉場果時，居然見到：
嘩！好正啊！呢張影得最好，不過影到玻璃倒影，塊玻璃又污糟……
之後去埋另外兩個Hall，可能係已經買左野，同埋好攰，冇乜心機行，九點出返來，去左附近Super Sandwiches食野。
返到屋企十一點，連續睇左兩齣DVD： 《Secret Window》同《Merry Christmas》，兩點半……
我而家真係如題……
Tuesday, July 18, 2006
《鬼域》
剛剛看過《鬼域》，這可算是我第一次看的靈異片，包括走入戲完和在家裏看。
以前看過《BeetleJuice》、《猛鬼街第四集》、《鬼眼》(西片)和《古宅心慌慌》，前兩者的鬼很卡通；後兩者只可以說是縣疑片，都沒有什麼鬼走出來嚇人的。
因為真係怕見到鬼，所以一直都沒有看過什麼鬼片。上面看的，第一齣在電視機看，是因為聽到音樂很高興，結果是一齣笑片；上中學的時候，因為去看西片會比較威風，約好同學，在小數服從多數下看了第二齣，由於Freddy的造型看過了，都沒有其他鬼，所以也沒有太過驚嚇；去看第三齣是因為喜觀那個小男孩，結果也一樣沒有太多鬼；第四齣終於鼓起勇氣，結果只是顏色很鬼片……
本身不太喜歡《七月十四》系列(因為看到海報就已經覺得很馬乎)，正正經的「鬼片」，例如《見鬼》系列、《三更》系例、日本製作及韓國製作的，一直都不敢看。
直至《鬼域》，李心潔說她說不定不會再拍鬼片了，彭氏兄弟拍了一次又一次，被人讚了一次又一次，今次也有不少人讚他們拍得美、美術造得美……因為「美」，所以很爽快就約了同事去看了。
結果，我還是一見到戲裏的鬼就怕，雖然那些鬼都沒有血，大概只有四款：1,臉色蒼白(不過主角也很蒼白)、2,用軍用化妝塗得一臉黑、3,一臉是灰，和2,一臉是泥。不過，每當有鬼出鏡，我還是得半咪著眼，只看著銀幕的下半部，原因是絕大部份的導演都不會將主要的東西放在銀幕邊緣，特別是近下面一方，就算要留伏線提示亦不會(因為一般觀眾都不會看得到的)，所以利用我這個方法，就不會看到鬼的樣子，但還是可以知道那些鬼跟主角的距離和他們的行動。
(待續)
Tuesday, July 11, 2006
菜
去泰國食左個菜幾過引，今日病(真病)，又見到街市有得賣，所以有樣學樣試下。工序係麻煩左少少，但係結果都唔差！
泰國完裝：
自己試煮：
整唔到人地咁靚……我見掉左D菜葉好似好浪費，就炒埋，結論係：我下次都係掉左D菜葉……
你估佢係乜菜﹖(食過唔好估，俾D機會人。)
搞左十世，都係佢！
早幾個月睇中左對鞋，唔佑點解就唔買，唔係貴，$89，唔買就係唔買…公司早前有高層見到有人着涼鞋返工唔開心，主管要求我地唔好着。有日落雨，着錯鞋，括腳，果日要教琴，未返到公司經頂唔駛，結果咪就買左…
Monday, July 10, 2006
做手工
其實我都幾鍾意做手工，好耐好耐之前已經「計劃」要自己做首飾俾自己，去旅行仲突登去買左好幾款石同珠返來！
「計劃」﹖冇錯，係計劃，因為一直都冇實行。
點解今次咁積極﹖並唔係因為剛剛買左新珠仔返來，而係發現數少左人頭，買少左手信…其中有一件返到來唔捨得送俾人，另外又有一件因為人地俾錯碼我送唔到……咁唯有積極D啦……拿拿淋走去買配件，去左幾間唔係太pro o既舖頭，都係買唔齊我心目中想要o既野…結果只係做得出一條：
第一次做，真係幾滿意！
小安安，條鏈係妳手信兼生日禮物，妳引頸啦(仲要度好長度，加番個扣)！等我完成所有手信之後，會再做埋手鏈俾妳，不過可能等好耐……