Saturday, June 24, 2006
放大假
頭先，負責編假果位人兄（我「匿稱」佢做「死剔手」）同我講：「我俾人捽呀，話點解會放妳同八太七月一二三，三日一齊放大假呀！妳唔駛同佢夾架咩﹖」
「車，我不嬲都係同放十二點果個夾假…係佢地兩個（指住八太同肥西兩個位）係都要等到最尾果幾日先放之麻！」
「咁妳唔知大假要夾架咩﹖」
「我都係第一年有大假咋喎！」
其實我都仲有好多野要繼續講，不過見佢死晒狗、冇晒氣，所以就放過左佢。
我覺得佢以上呢番說話，唔應該同我講，就算佢篤我出來，大佬問到，我都大條道理，因為：
- 果幾日大假係我遞先
- 就算我唔請大假，七月一號同二號我都一早霸左
- 我由舊年（2005年）到而家，咁多個公眾假期裏面，只係放過舊年個七一（加埋個七二，而且最後我七一讓返出來，唔記得邊個放左）、舊年boxing day，同埋今年年廿九，我今年趁生日連住個七一放都唔過份丫！
最麻煩係隻死剔手俾人捽完過晒氣先同我講！其實我想篤隻肥西出來好耐架喇！自從上年十一月少個人，早幾個月再少個人，D假期全部只可以放一個（最先可以放多個，但係再少個人之後就只可以放一個）佢次次紅紅假都要霸住，係三兩個月之前填定落去果隻！我想放個七一都要早三個幾月講到出口生日要埋，佢先至冇填咋！
Monday, June 19, 2006
收禮物
今日收左兩份禮物：
呢份係個同事去日本買番來o既手信，我屈到呢份番來。我終有一日會去一次箱根果個小王子公園！所以呢枝筆唔用住(真係唔捨得用)。
屋企個男人見到減價，買左隻俾我(其實係佢自己想買，見到有款o岩我再買多隻俾我)，$350。響信和，可以睇《蘋果》check番個地址。
Friday, June 09, 2006
懶散
因為懶，所以貼下圖算……
呢隻係我隻大脾：
擺呢個鋪屎之前，我會講：「花仔，come come！」
呢隻都係我隻大脾：
擺呢個鋪屎之後，我通常會講：「阿B，你咪阻住啦！」(每日剛剛沖完涼，坐上張床上面諗住查面果時，佢鬼咁快就坐定左……而我係仲未坐定……)
兩件旦散都係咁熱，就係感覺差好遠……
無無聊，見盆薄荷重到身唔直，就搣咁兩條，沖杯薄荷蜜，都幾好飲！(要用少少熱水沖先至會出味架！胃唔好o既話，要食左野先，唔好落咁重手。)
Saturday, June 03, 2006
好似真係瘦到
早前有人教我飲蒜頭醋減肥，好似真係瘦到。
所以繼續努力，浸多幾樽！
剛剛浸，藍到不得了，等到變返淺色就飲得！