Sunday, November 27, 2005
小器 小家 小心眼
我知道有很多人，包括我的朋友，都會說我小x是一個小器的人。
係，我真係好小器！我要憎的人，他做什麼我也看不順眼。
我是一個好均真的人，一就一，二就二，講一套就做那一套，除非我做不到，否則不會做第二套。所以，很多時候，我都會希望其他人亦會講得出做得到。不過，人愈來愈老，態度已經沒有以前那麼強了，亦都開始習慣到某一些朋友可以講一套做另一套，只要不會傷害到人，我都會算數(只限朋友)。
以下有一件事，我知我寫出來是很小器、很小家，但是我真的看不過眼。
有一晚，一班朋友聚在一起，好好玩的，當然亦過得好開心，雖然席間會坐著不是很好朋友的人，但也無損我的心情。直至尾聲時，大家都飽了，當然會有一些小點心吃不下，斯文純良先生一邊摸著肚皮一邊說著，桌上那個點心很好吃，想帶一點回家…當他正拿起膠袋準備要站起來的時候，恨嫁到出口小姐突然說：「我都想攞D
呀。」(那一碟是有兩款小點心的，斯文純良先生想要另一款。) 斯文純良先生：「妳先啦。」他一定會讓人的，在那個時候，我的臉還未有冒汗和加效果線的需要。
恨嫁到出口小姐當然不客氣，拿起膠袋就用筷子將那些撥進袋子…撥呀撥…我的臉上開始出現了一條條的效果線，由左邊額角開始…然後一大滴汗就在最左邊的一條效果線下流了出來…我看到恨嫁到出口小姐竟然將另一款小點心都撥進她的袋子裏！真的！我真的有再三看清楚，到底她是否換了另一袋，將另一款小點心載給斯文純良先，不過很失望，那是她自己的袋子。斯文先生呢，不知他是忘記了那另一款點心，還是不好意思繼續等待，我看到他別過頭去了。
至於結局嘛：之後，我們聚到另一班朋友的桌上，大家正好也吃剩很多小點心，我就叫人留起給斯文純良先囉。
我知道，其他人的桌上或者也會剩下很多小點心，在我臉上長出效果線的時候我都想到可以到另一桌上拿，但我氣的是「講一套做另一套」的事。我知道，那是很小的一件事，但很小的事做得好的話，也是可以皆大歡喜的，既然這樣又何樂而不為﹖豈需令人加上效果線﹖
我也知道，那件小事不值得我生氣，不過無論你要說我小心眼、小家還是小器，我就是這個樣子，這個樣子才是我——小x。
Saturday, November 26, 2005
出血 飆血…
睇報紙睇到西田大減價，見到有D野都幾o岩，就諗住一早去。到之前果晚，諗下諗下，都係認為訓多少少重要D，結果，只留三個鐘俾自己行街(其實都唔夠三個鐘)。
十二點幾去到，嘩，人山人海！99.9%都係女人！99%都係師奶！
想買羽絨褸，但係人好多，有出廣告果幾個counter全部都圍滿人，有條街(百貨公司同超級市場入面，分開一行行擺貨，行內人叫做「街」)D褸都OK，款同顏色又得，價錢同前面幾個counter差唔多，好想買，但係直覺叫我去買左手袋先…行左去"咪埋眼求其揀都唔會後悔"果間，買左兩個袋，一個去得飲墨綠色皮(外表係)手捖袋，$120，另一個係啡色格仔袋，校服同牛仔look都o岩，$158。買完袋行番出來，我知道點解直覺叫我唔好買褸住——我見到一條人龍，由西田一條商場排到另一邊個尾，如果我真係買的話，等人攞到貨俾我再排隊俾錢之後，可能我都要坐車走……
既然買褸無期，就去左睇眼線筆，終於俾我買到！仲有大半個鐘，就周圍行下…行下行下，突然俾我見到我最鍾意o既毛毛衫！見佢搬出來大減價，唔買都睇下啦！就走左埋去，見到一件平平地幾舊水，但係就係短褸，只遮到個胸同對膊頭，冇用！跟住見到真真正正褸款，嘩，件件六七千，平極都要三幾千，走得啦！繼續下個booth，背心款，心諗：「坐入車唔吹風，都着到半季丫。」再睇埋個價錢，$1999，係我自己o既極限，不過個款仲係差左少少…再睇埋隔離個booth，D款全部唔同晒，同時，有個阿姐(part-time，真係阿姐來架！)目及到我，走埋來sale，佢知我一定唔會買太貴，所以就介紹左件「爆炸」款背心俾我，係黑色兔毛裁短，間金啡色長毛反車(件衫橫間，D長毛係向上豎起，D長毛叉晒出來，好似爆出來咁！)穿上身，好有型，不過襯得唔好就會好師奶或者有「撈」味，$1999！另一件係classic款背心，啡色水貂皮，對胸企領，冇乜特別，但係穿上身都靚，都係$1999，全場得一件。我左諗右諗，好想有型，但係啡色果件就襟興……跟住問下兩隻毛有乜分別(其實都心裏有數水貂哽係貴D啦！賣咁平一定係舊貨。)，跟住阿姐就攞左旁邊一件一樣係水貂，不過個款係心口得一粒扣扭，對落斜開「人」字形，有白色長毛毛圍邊，好girlish的，不過個價錢係$6999(定係$7999，唔係太記得)！我再望多兩件背比兩眼，阿姐話買邊件都計我九折，又諗：「買兔毛同買水貂毛都一樣價錢，水貂雖然舊款但係貴好多，兼且唔駛怕D毛會變型(水貂果件係短毛)。」，就買左水貂被，最後碌某卡仲有九五折，$1710。
仲有十幾分鐘，剛剛好夠排隊攞禮券。
就係咁，我個銀包就飆左血喇…我諗要流到農曆新年先會止到血……
可惜…明天不夠冷，不能穿我的新背心……
Thursday, November 24, 2005
無聊人
以為自己好有諗頭小姐在網上留了很估怪的留言，我一見到就反感！為什麼要寫出一個實數﹖是認為有人會給少過那個數嗎﹖那，大方一點給多一點又不可以﹖
告訴妳，有人是會因為與一個人的關係親密不親密，而決定他要做得多與少——有人八百一千還要送禮，亦有人不去又不送禮。到妳真有機會結婚的一天，妳就會知道誰是妳的好朋友。
以為自己人見人愛小姐居然回應那個不是給她看的留言，沒人理不說出口，根本不會有人知道沒有人理妳嘛！人家都說「兄弟」，妳又不是姊妹，玩什麼個玩﹖
也告訴妳，要是人家真心要找妳，就一定會找妳，煩不着每一次都搶著搭咀。也到妳真有機會結婚的一天，妳就會知道妳有多少朋友。
我認為：
我們一對朋友的大好日子就到了！記著準時到啊！希望行禮時已見到大家！那一晚的遊戲很精彩，一定要玩啊！
Saturday, November 19, 2005
放假
今日放假，先按原定計劃去髮型屋。原本我心裏面係諗住可以好似洋娃娃咁樣可可愛愛咁…點知電左出來就散修修…唉，又係自己大安旨意話俾髮型師自己搞，人地鍾意時代感，真係唔怪得人……算啦，自認最靚果個都走左，我醜左少少都唔會有人理啦，唔其實我只係怕個頭要搞好多時間先出到門口。
響髮型屋行出來，都仲未夠六點，先入火車站行下街。入到一間日本韓國feel o既boutique，嘩…D衫原來可以咁貴，一件皺munmun o既薄大褸賣千幾蚊﹖！好過搶！
行左兩間舖，諗住坐車出旺角。唔知係咪有病，我每次有時間多都會搭錯車，今次又唔例外，出九龍走去上羅湖車……結果哽係見到藍色站就落車轉對面月台啦…
冇乾粉同埋眼線筆，去到朗豪坊西武，諗住有咁多間化妝品櫃台一定買齊野啦，點知揀好晒叫人攞果時，一個就個sales以為我運吉鬆左人；另一個就話冇貨…冇貨都可以算，最多搵日再去搵過，sales跟跟下個客都走得，我一定唔會等或者返轉頭！最後去左第二個櫃台，買到乾粉，眼線筆又唔o岩色…唉…希望來緊幾日夠時間啦，買左返來仲要練習……
買買下野，阿貓就到左，一齊去左樹熊(同Sunny、Cherry同個朋友)間新舖，好似舊舖翻版…好老實講，如果又係賣差唔多果D野，對我吸引力唔大。
見到Cherry，嘩，完全冇做人伴娘o既知覺，算數，反正佢又唔係我伴娘。
玩左一陣，就同阿貓去左搵野食，想叫樹熊出來食，但係佢話同Cherry一齊看舖喎，我地就繼續行行逛逛…見到女人街檔賣毛毛披肩，幾草又有幾百都有，唔係手工差左少少的話，我一定賣左…跟住見到新開間新寶戲院，五十蚊有戲睇，阿貓話想睇《殺破狼》，見仲有個幾鐘頭食飯，就買飛睇，樹熊都睇…行左一陣，周圍都滿位，求其入左間茶餐廳食完，再去左間糖水舖。響糖水舖見粟子糊好似好新鮮咁，就叫來試下，一入口，好粟子味，但係食慣左一粒粒粟子，咬下咬下，而家係唔駛咬o既粟子，感覺有少少怪。
《殺》幾好睇，可以話好耐冇睇過咁o既港產片，值得入場睇，講真又唔係好有特技、畫面又唔係好細緻，幾十蚊入場睇好過等VCD，呢D片過左氣就唔想睇。評語：難得黑社會有一個佢地真係好「驟忌」o既結局。
睇完戲冇車坐，兩頭唔到岸，留響樹熊間舖一陣，幫過下手咁啦。見到佢(其實係Cherry拉入來)個partner…恕我老實講句，如果佢唔成日閪(睇唔到個字的話，個碼係「日弓一金田」)口閪面，我包佢三年內一定有個結得婚o既男朋友！(對唔住，請唔好講番俾當事人聽。)
Friday, November 18, 2005
又脫稿…
唉，我又脫稿…
早排個電腦壞左，屋企有第二部電腦，不過成人俾人攞左來打機……
仲有九日，就要去飲人喜酒聽日就去頭髮，但係我仲未ready……身型未ready。
上個星期我同自己講過話要減肥，減到好fit去整頭髮，結果，日日都抵抗唔住誘惑，係咁食野，又賴床冇早D起身做幾下運動……成身D肉同埋肥膏原封不動響度。聽日見到我個髮型師，一定又俾佢笑我又肥左……唉……
唔得！我一定要減！
(希望減到啦…)
Saturday, November 05, 2005
Fit馬=二奶﹖
個二奶八婆四走左一天都光晒！我開始feel到少少o既公平存在——大佬係有揀人用，不過分工都幾混循，都算有大(編)野寫；亦有其他大佬直接搵我幫手……我開始覺得我唔係可有可無。
我好想快D學到多D野，戒埋D失魂，因為我真係好想取代隻八婆四以前個地位——係工作上行先o既地位，唔係放個胸上枱o既地位——我唔要做佢「阿二」。講真，大叔真係等退休；少奶等到生仔就會走人，同埋佢有小玩野；小肥呢，係寫得好，但係唔肯蝕底，如果唔補新人的話，我真係最後生、最抵得諗同埋最聽話果個。
不過，補新人，亦真係遲早o既事，八個星期六日四個人分，本來都每人可以分到兩個，但係大叔好鍾意放星期六，少奶又成日靜雞雞爆晒D星期日，小肥又要唔執輸，本來我可以冇所謂，但係我隔個星期六有野要做，你話我點算﹖長期係咁一定死。
而家都唔知大大佬交左我地個工作報告上去未，但係一半(甚至更多)機會係交左，隻八婆四走(傳聞交報之後果日)之前我都冇得表現自己，咁即係話我好大機會都仲要捱果雞碎咁多人工，最少都要等多年(公司唔蝕出血的話)先會有機會加人工，所以我而家要努力，唔係新人入到來又寫得o既話，我又會打回原型！
相士話我下年會有「變動」，叫我「不怕」，我希望係「工作變動」、「職位變動」、「人工變動」、「老細(態度)變動」……
Wednesday, November 02, 2005
可喜可賀
今日隻牛話辭職，今日遞信今日就走！真係好！
佢話喎，新公司人工好，又肯幫佢賠錢俾公司，我吥！呢個年頭，邊有咁大隻蛤蜊﹖！我識有人年薪三十萬，單單生意幾十至幾百萬，辭職果時新公司叫佢自己搞掂；我又識人年薪過百萬，睇晒一個area o既業務，辭職果時新公司都係叫佢自己搞掂。仲要係，我地呢D收收埋埋響工公司入面寫稿都會有人挖角﹖咪玩我啦！
隻牛月中開始經已得意洋洋，所有野攤長來做，又發人脾氣話人地好俾咁多野佢做，做野又做一半(我直頭懷疑佢有心輸新聞)，仲特登響高層面前大聲講私人電話或者搵其他同事傾閒偈，明知有野跟又專登行開唔響位，又響自己個位度大大聲聲約之前被炒o既人出去玩…你話佢唔係搏炒係乜﹖最敝係D所謂大佬個個都錫開佢，全部都冇出聲，結果佢o既o累炒計劃行唔通，今日就諗住玩一鑊繞起即刻走。哼！o累唔成炒，而家響度扮上菜！我就認為係佢條仔夾錢幫佢陪！如果新公司真係有得幫佢賠，佢就唔駛o累炒啦！
隻牛明之自己走，都唔請散水餅，大肚婆唔忿氣，係都要屈佢請飲野，佢個賤人，落到can記話自己唔可以入閘(其實點會入唔到，佢個證係出左門口入唔返，唔會去唔到can記，玩野就真)，死都唔肯試，要大肚婆自己一個入去買，當然就諗住要佢自己一個拎，等佢出醜！車！大肚婆你精我都唔笨，即刻打電話叫人幫佢拎。
D野食一上到來，就冇人理佢，佢俾人屈左一餐唔忿氣，拿起個袋就即刻走，「拜拜」都只係有早更幾個同級o既應佢(佢地對住個門口坐，冇法啦)，哈！
最可憐都係鬍鬚，由頭到尾都係信錯左人…唉，到今日先至知邊個係二五…話唔定老闆要緝果個「真兇」係佢添！
但係佢走左之後，少左個人俾我地笑lu……可惜我仲未報到仇！