Tuesday, May 31, 2005
大o野 (續編)
今日突然有好多事發生，所以一返工就有o野做，但係都係戰戰兢兢，怕會有老細走來怪責我。
後來趁鬆動少少睇番報紙，我終於知道點解冇人來找我悔氣——原來某高層跟左大隊，將o的料改左先出街。
Monday, May 30, 2005
我都唔算太過份掛﹖
樓上無啦啦總動員(大佬、女友、舅仔、兄弟)，兩點幾話去打波，叫埋我去睇下、吹下水。我俾個面就去啦。
行行重行行，行左幾乎成公里，去到球場，都知死哽…冇燈、冇櫈…淨係得蚊！
企一個鐘，俾蚊咬左兩下，跟住就來料……D蚊起勢咁來…手肘、手臂、手指、頸，中晒，兼仲不時有蚊響塊面前面哄下哄下。
三點尾，我頂唔順。
四點，我開到口話好多蚊，人地女友又幫口，班友都仲未肯停！話打多兩球，點知一打又唔停！俾蚊咬已經好唔鍾意，仲要冇得訓，咁就真係世係假！！！結果頂唔順，一句「走喇！」就行左去。
佢地當然唔會唔理我，跟住走，但係我真係好頂唔順！所以都冇理到佢地，係咁一味行。中途佢地都有人搵話題同我講，但係我真係完全冇心情。
「我已經N日冇訓過，聽日都仲要早起身呀！」
直至返到屋企、打緊呢個blog，我塊面都仲係未燶完。
----------------------------------------------------------------------
大佬，我係你地邊個先﹖我同你地出去，係俾面你地，都希望你地俾番D面我丫！
我都有少少覺得自己過份，但係我認為應該發老脾。
大o野
我好怕寫大o野。
我只係一個一般員工，平時有特權，做o野又冇一棚人幫手，乜o野都要自己一腳踼，所以我好怕做大o野，我怕一個唔小心搵錯料，問得唔夠深入，寫得唔好，出到街衰左，咁就大大鑊，死十次都唔掂。
試過寫得唔好，第二日即刻冇人俾o野我做。睇住個個做到死，自己一單o野都冇，會響度諗：「係咪試緊冇左我O唔OK呢﹖」「係咪諗住炒得我，所以就開始唔俾o野我做呢﹖」…唉，抱住呢個心情返工，真係好辛苦，我怕我真係有一日會神經衰弱。
今日，有單o野，自己大佬做中型，但係樓上話要做大佢，即係本身唔係咁大單，但係要做到佢大大單。咁就慘喇！結果，冇記者做到，索到料又冇人報，單o野冇得做資料搜習，要靠自己查新聞處、問官方發言人。左搞右搞，總算交到稿，但係臨尾又話我收到D料在行家果D有出入……記者自己索到料，冇人主動報。我而家擔心緊，大老細會唔會信出面唔信我，話我冇問清楚…我又怕我問得唔夠詳盡(其實都經已好詳盡)，唔夠內容……
希望聽日返工會有o野做啦。
Sunday, May 29, 2005
新的網誌
我開了一個新的網誌戶口。
我沒有在現有的這個戶口多加新網誌。
那是新的戶口；新的網址。
我為我的新戶口和網址改了個我自己認為很浪漫的名稱。
我仍然會繼續寫這個網誌，但會將不想立即告訴人的事寫在新的網誌中。
朋友，你不用找了，到約干日子後，我自然會告訴你。
新的網誌，我是放著她的，讓路過的人心血來潮看。
才剛幾天，就真的有人路過了，還鼓勵我呢！
Friday, May 27, 2005
係人都知妳好多頭住家啦！
搵老婆先生近日冇再偷偷地望我，但係佢唔係冇望我，而係用一D好歧視o既眼光望我。我冇打錯，大家亦冇睇錯，係「歧視」，唔係「奇異」。
我正散餐都冇預佢果份，當然冇咁好心情走埋去問佢做乜事啦。最後，我禽晚終於有機會同佢講野(應該係話，佢終於有機會同我講野)，而佢又終於忍唔住同我講野(又應該係，佢終於忍唔住要俾D野我聽)。
話說我搬左新屋，夜晚返屋企條路靜到俾人強姦姦十次都未必返到去，所以一早同住響汀角路某同事講，請佢車我出路口放低我。因為反正都係果條路，只係停一停俾我落車，唔會兜遠左，果個同事就哽係冇問題。只係佢本身有老婆，公司又有阿二就係人都知，加上佢把口勁唔收，個個女性生物都俾佢講到好似同佢有路咁。
其實，佢車唔車，我坐唔坐都唔係問題，但係契爺成鬼日都係咁同我講夜晚好危險，一定要叫阿有老婆先生車我出去呀咁，而阿有老婆先生又成日同我講義氣，搞到我想唔坐都唔得。
其實我都想搵過第二個同事車我走，因為佢真係唔趕住走架，又鍾意吹水，成日吹到個個走晒先至走，佢又鍾意約人食宵夜，我搬左一個星期唔夠，坐左佢車三晚，佢已經「呻」左兩晚話約左人宵夜，搞到我鬼咁唔好意思(最弊係：佢係都要等到人人都走晒先同我講，我想跟第二個同事車都已經太遲…你話係咪玩野﹖)另外，如果我冇乜野又走去搵第二個同事，就好似落佢面咁。而家都唔知點好…都係同佢講清楚，叫佢約左人就早D同我講算。
坐車問題都未算…最大o既問題係：我開始感覺到我背後有閒話……
話說，阿搵老婆先生響我(臨)放工同班同事吹緊水果時走過來搭咀：
「乜妳仲唔走﹖」
「我等阿有老婆先生掉我出路口丫嘛。」(我搬左屋之後，好多人都走來問候我，我諗住個個都知…)
「下﹖出汀角路﹖」
「係呀。」
(……都唔係好記得講左一兩句)
(突然間，佢無啦啦咁講，仲要係「俾說話我」咁o既語氣)「咁又係，妳咁多頭住家…」
(跟住我明白晒喇！我用好奇異o既語氣答佢)「下﹖我o岩o岩搬左屋喎，就響汀角路lor！」
言之後，阿搵老婆同事就垂低晒頭咁走左。
我明白晒喇！我肯定有人響我背後唱我！
不過呢…到卅幾歲人都仲信埋D眼睇唔到o既野，唉…！
到底係邊個呢﹖阿搵老婆先生響突發好少好朋友，但係果幾個嫌疑者(諗到得兩個#)我都同佢冇乜過折，都唔知佢點解要咁做。我返工果時一定要捉住佢問清楚！
#疑犯一號：十九，佢為左條女乜都做得出，以佢平日咁鍾意篤人背脊，踩底人地陪佢(踩底人係抬唔高自己架！)，係佢唔出奇。
疑犯二號：周師叔(唔係想話佢係師叔，係師奶的相反，話佢嫁左俾佢老婆咁解)，佢平日好想埋某大老細堆，但偏偏某大老細係阿有老婆先生o既好朋友，佢唔抵得人地唔抵得到出晒面(真係我都睇到，唔知佢自己知唔知)，但係中傷還中傷，害到我就唔好啦！
Thursday, May 26, 2005
步法
有一日坐小巴，有一個中學女生衝上車：
「司機，請問呢架車到唔到XX中學架﹖」
「到~！不過要落左車行過去架喎！」
「咁，要行幾耐架﹖」
「咁就要睇妳步法喇！」
(全車乘客)「哈…」
Wednesday, May 25, 2005
新屋的第一晚
搬屋的費用，包括了重組組合架和床架，所以在屋的第一晚就立即可以睡了。也在這一天，安排了安裝電話、寬頻和寬頻電視，就立即可以用 電話和看電視了。只是滑鼠不知往哪裏放了，沒有開電腦。
經過搬屋一役，花仔和阿B可真的嚇個夠，突然有很多宿生的人，突然要熬車，突然有新環境…外邊好多從沒聽過的雜聲，鄰居的狗吠個不停…。結果，花仔躱了半天洗手間、半天床下底，怎麼也不出來；阿B算是「精」一點，吃過兩啖貓食後，就跳(攀)到組合架上，坐了一整天。直至深夜我要睡覺的時候，花仔才走出來看看，阿B要到第二個早上才見到她在地上走呢……
很快地，他們兩個都很習慣了。
Sunday, May 22, 2005
搬屋喇！
我終於都搬屋喇！臨搬的一夜，整整都在收拾，沒睡過。到七點多，搬屋工人打電話來，說八點就到了，不是嗎﹖不是說八點半的嗎﹖沒法子，只好加快動作…最後，他們來了，我還有很多東西未收起。
他們對我說不打緊，跟着就問我什麼要什麼不要，他們就開新紙箱給我通通倒進去。結果，很不應堆在一起的東西都堆在一起；不應帶來的東西帶來了；應該帶來的東西遺下來了…
搬着倒着，4466也來了，陪我跟車。
花仔怕得躱在房下底，我一手就將他拉出來，很快就送進了鬼竄袋，反之，阿B當時不知所踪，原來她躱在組合架的下面。當架被拆走後，她就急忙衝入睡房，就有一團白色的東西衝入睡房，那當然是阿B，不過她很快就後悔了。睡房內，有個工人在拆床，阿B就跑出來，可是都沒有地方躱了，只見她到處亂跑亂跳，怪可憐的。我幾乎都捉不到她，幸好是真的沒什麼地房可以躱，就趁她左顧右盼的時，將她逮住了。
就這樣，一人一隻，兩個女人，四眼惺忪，八隻人貓，上車去也。
九時多，車就到了，工人張大盒小盒的搬上樓(我住1/F，即是二樓)，最後搬鋼琴，幸好夠位，一個人用帶掛在自己身上，兩個人在下面抬，琴慢慢就搬上來了。搬完之後，工人將組合架和床切回原狀後，就是付錢時間，千九元，減去五百元訂金，就是千四元，工人都這說，我看他們搬鋼琴是如此辛苦，早就決定多給一百元(四個人，每人廿五元，買到一個平宜的午飯，再說，再多我可不無力了)，在我努力從銀包裏拿錢出來的時候，那工人居然在喊辛苦，著我給錢「買野飲」。不是嗎﹖不是說過不會(開口)要茶錢嗎﹖最後，我跟他說「這裏千五元」(他之前是說過餘款是千四元，我不想多說是茶錢，所以就說千五元)，那可能是很少的錢，我預計他不會說「多謝」了，結果他仍在跟我說「兄弟搬得好辛苦」、「給一些茶錢啦」之類。太過份了罷﹖！餘款千四，我付兩張五百、五張一百，還說是千五元，難道我還會要你找錢﹖！
結論是：原本覺得很合理的一百元，在很不開心的情況下付了。(那些自稱是基督徒的人，還很賴皮，他們給4466搬屋時，說這些多了，那些加了，你的頭頭沒跟你們溝通，卻又不敢當面對質！)
工人走了，十時多，我跟4466放開了一些東西，就出去吃東西了。
下集：新家的第一天。
Friday, May 20, 2005
明天，我就要搬家了！
明天，我就要搬家了！我會跟你很近很近呢！
近來聽說你跟某幾幫人表白了，他們都很開心呢…曾有傳聞你月中就會跟我表白，告訴我我對你有多重要，可是我一天又一天的等，還是等不到…現在又有一個新的傳聞，就是月尾了…
好擔心，愈是不好的消息，就是否愈遲公布比較好﹖唉，心急死我了！
言而，我現在還沒收拾好……
看著天，灰灰紫紫的。有個家裏捉漁的舊同學告訴我，晚上看到天空是紫色的，就表示明天會下雨，愈是紫紅，雨愈下得大。天啊天！請妳告訴我你是粉紫，還是粉紅﹖
Monday, May 16, 2005
飛bra走奶
剛剛知道有人給「靚女」改了另一個花名——乳牛。我之後就叫她做「阿牛」。
看過這blog的讀都會知道，阿牛平常都是deep-V挺胸，但最近她變本加厲了，今天還飛bra走奶！
今天她穿黑色米色闊邊的小背心，deep-V是指定動作的了，內裏配了黑色bra。
一般只有「不拘小節」的阿嬸，或很有型/扮有型的女子，才會肯在背心外露bra，但通常亦只會露帶，永冇見到杯。
阿牛並唔係以上類型，不過，我今日見帶又見到杯！而阿牛仲係有著外套架！
我都認為呢件事係匪夷所思！但見到係千真萬確！
原因係，阿牛件外套！件外套唔係see-through，但係唔知點解，佢可以將件衫著到只係掛響個膊頭到，搞到件外套連格肋底都遮唔到！真係神乎甚技！
咁都未算！後來，我發現佢仲有絕招！佢竟然可以將件外套變成low-cut咁著！將件衫條邊掛響膊頭外側！
注意：係膊頭外側！之前係掛響膊頭上面，後來係膊頭外側！件衫係唔跌架！剛剛好掛住響膊頭外側！
# 我在空閒的時候畫了圖解，各位認為如何﹖
正餐
正餐(偷)看了這個blog，就跟我分手了。
分手沒什麼感覺，因為是我自己先沒心機(要不然都不用想散餐了)。
那份正餐，不是吃厭了，而是因為在不合胃口。到今天，才有人倒胃，仍不算太遲；要是繼續再吃三幾年才發現要倒胃，就實在太慘了。
沒正餐，沒問題，吃自己就可以了。
不過，師父真的沒批錯，這頭說正餐沒得吃，那頭就有散餐送上門(其實還不是想乘虛而入)！那份散餐給我開出了很優厚的條件：
他會盡力疼我、照顧我。(他知道自己未有條件做正餐)
他會單向地喜歡我，我不用對他好。(他知道我沒有心)
最優厚的是：
在我找到另一份正餐的時候，他會自動消失！
嘩！那麼好的條件，哪裏找﹖！
不過，我是一個怕麻煩的人，就放著他觀察一下罷，等到我有空去找樂子時，他仍能為我維持這些條再說。
~~~~~~~~~~~~~~~~~~~~~~~~~~~~~~~~~
再講，那個人突然走來就說喜歡我，
我有那麼「可愛」嗎﹖
Friday, May 13, 2005
散餐
近來總是悶悶的，又勾起吃散餐的衝動。
可是，總是困在公司和家兩個地方，要找人真不易。
有人提意在就近找一個，亦似乎見到有一些人正向我招手，可是不行！
這位先生，不行，因為你的樣子像在找老婆，太認真的話，我負不起責任。
下一位先生，不行，因為你的像子太輕浮，傳開去的話，我乘擔不起後果。
再來下位先生，不行，因為你的電話定時定候就響，給發現的話，我死十次不成。
再來多一位先生，不行，雖然你不一定要細水長流，也不似很隨便的人，現在亦未有女友，更不介意暫時當散餐一頓，但我要是吃了你，在外的壓力就隨之而至，那就沒有開心的餘地了。就算要吃，也請讓我們先取得共識，慢慢的來罷。
總之，太近已經有九成不行了！
#以上有部份是自我幻想。
搬屋——收拾篇
約了運輸公司來報價，他殺我千九，見他是教徒，又不收茶錢，就算了。當時我還沒有半件家具，也要千四再加茶錢，現在這個價錢算差不多罷，我也沒心情去格價了。
運輸公司的人給我廿個紙盒，一下子放了兩箱半，但屋子的雜物仍多的是，希望再問他拿多幾個紙箱不會加錢罷。
~~~~~~~~~~~~~~~~~~~~~~~~~~~~~~~~~~~~~~~~
搬屋的日子決定了——就在廿號，還有一個星期。下個星期起，我們就會變得很親近了。
你最近顯出一臉博愛，那不是問題，因為我的心目前仍然是一廂情願的向著你。雖然你說你愛很多人，但還沒有見到甚麼實察上的行動。希望你的博愛是真心真意的，也希望你會愛我愛得多一點，愛我愛得公平一點。
Tuesday, May 10, 2005
至高境界
我的工作，每天都不會太多。
我做突發新聞寫手，是聽天由命望天打掛的工作，時多時少，當然，要計的，都總會有自殺、車禍…高峯期。不過，每日平均都只是三數件工作，最多只試過七份。
無他，新聞都有貴賤，到新聞多過版面的時候，新聞就變後賤，大佬亦開始揀擇，賤到某一程度的新聞都不用寫了。這樣，就取後平衡，工作量永不會過多。
我都總有忙的時候：當新聞都同等地貴，或同等她賤，大老就會要大家什麼都寫一下，又或寫貴的新聞太遲發生，要趕截稿。
我上中更，一五至二四，要趕二三截稿，怎算都是最忙的一更。
新聞會由通宵更的同事開始做，他們只寫寫草稿，因為不用真的交上去，所以大家都是求其是但。
稿子交給早更同事再寫一次，同事再有事發生，就繼續加上去。
早更的同事個個都練得一新蛤蟆功，其中最了得的一招可算是一身蛤蟆皮，個個滑不溜手。
早更同事，每日十點上班，看報紙、吹吹水…到十二點至兩點，分批食飯…至三點，開始工作，七點全部收工。
早更同事菜單裏，每天每人都有五六宗新聞，但要真正寫的，還不到三幾宗，甚至一兩宗。為什麼呢﹖因為早更沒有大佬(大佬都上中更，趕稿用)，所以他們會將不太貴的新聞都先扣起，待大佬上班再決定，若大佬決定要就要找個人寫…重點就在這裏！
大佬上班，即是中更上班，這個時候，早更開始擺出發力的樣子，啊，好忙碌啊！大佬見到這個情況就會說「哎，你地得果三個幾鐘，仲有三單野響手，咁新果D俾晏晝D同事啦。」有時，早更同事甚至將一兩單新聞玩到放工前一個鐘，死都不願交，你問他，他就答你「還有資料未到手」「我問緊學者，未覆」…結果，每一篇都真的等齊料才開筆寫，當然很趕啦！另外，當有新聞要問官方、專業人事或學者意見，他們會先問官(因為官五點收工，一定有電話號碼，放工前一定有人接聽，所以問不到要被問責)，然後再揀冷門的科目(因為冷門的「有發揮」，問得到大老會讚)，最後將社工、心理學家之類的推給中更，他們會在收工前一至兩小時，偷偷(怕中更知道，其實再怎樣偷偷地，我們都是聽到的)致電一些很夜才會覆，或甚至未不會覆人的人士，然後在收工前一刻告訴大佬「我乜人都CALL晒喇，但係都冇人覆我…」，這樣，大佬就會在中更找人接上。
如是者，扣起的新聞是中更寫，新發生的新聞是中更寫，早更「太忙寫不起的稿」是中更寫，未有人回應的稿也是中更寫。
公司到何時才會將早更的人工，在中更的薪水裏發﹖
Saturday, May 07, 2005
搬新屋
新屋決定了，就在那兒，就在你的附近。
我現在雖然幾乎每天都見到你，以後還是一樣幾乎每天都見到你，可是以後都不用坐車才能去到你那兒，走幾步就可以了。
雖說是在你的附近，甚至可以說是旁邊，但你我仍然會維持這個狀況罷。我希望這樣——我們之間仍保留一點點距離，那是我們對彼此的一點點神秘感，我不知道那對於你而言是什麼，但對我來說是無限的幻想空間。
你的出現，令我在徬徨中得到一絲曙光，令我在落漠中重拾希望…漸漸地，我已習慣與你一起的相處方式，不知不覺間，我覺得自己愈來愈需要你。
你一直都擺出要人靠近的姿態，起初我真的心如鹿撞，我好想再靠近你一點，然而，你又突然顯得很抗拒，令我不知所措，而近來你又好像軟化了點…你敎我怎辦好﹖
在未來的幾年裏，我們都能維持這個關係，就已經很好了(雖然，我不知道自己有多愛你，但若是可以的話，請你多給我一點愛)。
~~~~~~~~~~~~~~~~~~~~~~~~~~~~~~~
親愛的讀者，你/妳明白我在說什麼嗎﹖